ಹ್ಯಾಪಿಯೆಸ್ಟ್ ಮೈಂಡ್ಸ್ ಟೆಕ್ನಾಲಜೀಸ್ ಲಿಸ್ಟಿಂಗ್ ದಿನ 110%ಗೂ ಹೆಚ್ಚು ಏರಿಕೆ

ಹ್ಯಾಪಿಯೆಸ್ಟ್ ಮೈಂಡ್ಸ್ ಟೆಕ್ನಾಲಜೀಸ್ ಬಿಎಸ್ ಇಯಲ್ಲಿ ಗುರುವಾರ (ಸೆಪ್ಟೆಂಬರ್ 17, 2020) ಪ್ರತಿ ಷೇರಿಗೆ 351 ರುಪಾಯಿಯಂತೆ ಲಿಸ್ಟಿಂಗ್ ಆಯಿತು. ಪ್ರತಿ ಷೇರಿಗೆ 166 ರುಪಾಯಿಯಂತೆ ವಿತರಣೆ ಮಾಡಿದ್ದು, ಎನ್ ಎಸ್ ಇಯಲ್ಲಿ 394.95 ರುಪಾಯಿವರೆಗೆ ಓಟ ಮುಂದುವರಿಸಿತು. ಮಾರ್ಕೆಟ್ ಏರಿಳಿತದ ಮಧ್ಯೆಯೂ ಹ್ಯಾಪಿಯೆಸ್ಟ್ ಮೈಂಡ್ಸ್ ಟೆಕ್ನಾಲಜೀಸ್ ಗೆ 150.98 ಪಟ್ಟು ಹೆಚ್ಚು ಬೇಡಿಕೆ ಬಂದಿತ್ತು.

2.32 ಕೋಟಿ ಷೇರುಗಳ ವಿತರಣೆಗೆ 351 ಕೋಟಿ ಷೇರಿಗೆ ಹೂಡಿಕೆದಾರರು ಬಿಡ್ ಮಾಡಿದ್ದರು. ಅವಧಿ ಪೂರ್ವ ವಹಿವಾಟಿನಲ್ಲಿ ಷೇರಿನ ಬೆಲೆ 350 ರುಪಾಯಿಯಲ್ಲಿ ನಿಂತಿತ್ತು. 702 ಕೋಟಿ ರುಪಾಯಿ ಸಂಗ್ರಹಕ್ಕಾಗಿ ಸೆಪ್ಟೆಂಬರ್ 7ರಿಂದ 9, 2020ರ ಮಧ್ಯೆ ಐಪಿಒ ಸಬ್ ಸ್ಕ್ರಿಪ್ಷನ್ ಇತ್ತು. ಪ್ರತಿ ಷೇರಿಗೆ 165ರಿಂದ 167ರ ದರ ಹಾಗೂ ಕನಿಷ್ಠ 90 ಷೇರುಗಳ ಲಾಟ್ ಖರೀದಿ ನಿಗದಿ ಮಾಡಲಾಗಿತ್ತು.

ಪ್ರಸಕ್ತ ಹಣಕಾಸು ವರ್ಷದಲ್ಲಿ ಇದು ಅತ್ಯುತ್ತಮ ರಿಟರ್ನ್ಸ್ ನೀಡಿದ ಐಪಿಒ. ಈ ಷೇರಿನ ಲಿಸ್ಟಿಂಗ್ 300 ರುಪಾಯಿಗೂ ಹೆಚ್ಚಿಗೆ ಆಗುತ್ತದೆ ಎಂದು ತಜ್ಞರು ನಿರೀಕ್ಷಿಸಿದ್ದರು. ವಿತರಣೆ ಬೆಲೆಗಿಂತ 140 ರುಪಾಯಿ ಪ್ರೀಮಿಯಂಗೆ ಲಿಸ್ಟ್ ಆಗುವ ಅಂದಾಜಿತ್ತು. ಕೊರೊನಾ ಬಿಕ್ಕಟ್ಟು ಕಡಿಮೆ ಆಗುತ್ತಿರುವುದು ಹಾಗೂ ಎಲ್ಲ ವ್ಯವಹಾರಗಳಲ್ಲೂ ಡಿಜಿಟಲೈಸೇಷನ್ ಹೆಚ್ಚಾಗುತ್ತಿರುವುದರಿಂದ ಐಟಿ ವಲಯದಲ್ಲಿ ಚೇತರಿಕೆ ಲಕ್ಷಣಗಳು ಕಾಣುತ್ತಿವೆ.