ಹೋಂಡಾ ಅಮೇಜ್‌ 2021 ಕಾರು ಭಾರತದಲ್ಲಿ ಬಿಡುಗಡೆ: ಬೆಲೆ, ಫೀಚರ್ಸ್‌ ತಿಳಿದುಕೊಳ್ಳಿ

ಪ್ರಮುಖ ಕಾರು ತಯಾರಕರಲ್ಲಿ ಒಂದಾದ ಹೋಂಡಾ 2021ರ ಹೋಂಡಾ ಅಮೇಜ್ ಅನ್ನು ಭಾರತದಲ್ಲಿ ಬಿಡುಗಡೆ ಮಾಡಿದೆ. ಆರಂಭಿಕ ಬೆಲೆ 6.32 ಲಕ್ಷ ರೂಪಾಯಿ ಬೆಲೆಯಲ್ಲಿ ಕಾರು ಬಿಡುಗಡೆಗೊಳಿಸಲಾಗಿದೆ.

ಈಗಾಗಲೇ ಭಾರತದಲ್ಲಿ 5,000 ರೂಪಾಯಿಗೆ ಬುಕ್ಕಿಂಗ್ ಆರಂಭಿಸಲಾಗಿದೆ. ಹೋಂಡಾ ಅಮೇಜ್ ಫೇಸ್‌ಲಿಫ್ಟ್‌ನಲ್ಲಿ ಅನೇಕ ಹೊಸ ಸೇರ್ಪಡೆಗಳು ಮತ್ತು ಆಧುನಿಕ ವೈಶಿಷ್ಟ್ಯಗಳನ್ನು ಸಹ ನೀಡಲಾಗಿದೆ. ಇದರ ಜೊತೆಗೆ ಕಾರಿನ ಹೊರಗೆ ಮತ್ತು ಒಳಗೆ ಸಾಕಷ್ಟು ಬದಲಾವಣೆಗಳನ್ನು ಮಾಡಲಾಗಿದೆ.

ನೀವು ಹೋಂಡಾ ಶೋರೂಂಗೆ ನೇರವಾಗಿ ಭೇಟಿ ನೀಡುವ ಮೂಲಕ 21,000 ರೂಪಾಯಿಗೆ ಬುಕ್‌ ಮಾಡಬಹುದು. ಕಂಪನಿಯು ಈ ಹೊಸ ಮಾಡೆಲ್‌ ಉತ್ಪಾದನೆಯನ್ನು ಆಗಸ್ಟ್‌ 5ರಿಂದಲೇ ಪ್ರಾರಂಭಿಸಿದೆ ಮತ್ತು ಶೀಘ್ರದಲ್ಲಿಯೇ ದೇಶಾದ್ಯಂತ ಇದರ ವಿತರಣೆಯನ್ನು ಆರಂಭಿಸಬಹುದು.

2021 ಹೋಂಡಾ ಅಮೇಜ್ ಅನ್ನು 1.2-ಲೀಟರ್ i-VTEC ಪೆಟ್ರೋಲ್ ಮತ್ತು 1.5-ಲೀಟರ್ ಡೀಸೆಲ್ ಎಂಜಿನ್‌ನೊಂದಿಗೆ ಮ್ಯಾನುಯಲ್ ಮತ್ತು ಆಟೋಮ್ಯಾಟಿಕ್ ಗೇರ್‌ಬಾಕ್ಸ್‌ಗಳನ್ನು ಜೋಡಿಸಲಾಗಿದೆ. ಇದರ ಪೆಟ್ರೋಲ್ ಎಂಜಿನ್ 89 ಬಿಎಚ್ ಪಿ ಪವರ್ ಮತ್ತು 110 ನ್ಯೂಟನ್ ಮೀಟರ್ ಟಾರ್ಕ್ ನೀಡುತ್ತದೆ. ಇದು ಮ್ಯಾನುಯಲ್ ಮತ್ತು ಸಿವಿಟಿ ಗೇರ್ ಬಾಕ್ಸ್ ಎರಡರ ಆಯ್ಕೆಯನ್ನು ಹೊಂದಿದೆ.

ಮತ್ತೊಂದೆಡೆ, ಇದರ ಡೀಸೆಲ್ ಎಂಜಿನ್ 99 bhp ಪವರ್ ಮತ್ತು 200 Nm ಟಾರ್ಕ್ ಅನ್ನು 5-ಸ್ಪೀಡ್ ಮ್ಯಾನುವಲ್ ಗೇರ್ ಬಾಕ್ಸ್ ಮತ್ತು 79 bhp ಪವರ್ ಮತ್ತು 160 Nm ಟಾರ್ಕ್ ಅನ್ನು CVT ಗೇರ್ ಬಾಕ್ಸ್ ನಲ್ಲಿ ಒದಗಿಸುತ್ತದೆ. ಇನ್ನು ಕಂಪನಿಯು ತನ್ನ ಎಂಜಿನ್ ನಲ್ಲಿ ಯಾವುದೇ ಬದಲಾವಣೆಗಳನ್ನು ಮಾಡಿಲ್ಲ.

ಅಮೇಜ್ ಪೆಟ್ರೋಲ್ ಕಾರು 18.6 kmpl ಮತ್ತು ಡೀಸೆಲ್ ಎಂಜಿನ್ ಕಾರು 24.7 kmpl ಮೈಲೇಜ್ ನೀಡುತ್ತದೆ ಎಂದು ಕಂಪನಿ ಹೇಳಿಕೊಂಡಿದೆ. ಇದರೊಂದಿಗೆ, ಕಂಪನಿಯು ಕ್ರೋಮ್ ಪ್ಯಾಕೇಜ್ ಮತ್ತು ಅಮೇಜ್ ನಲ್ಲಿ ಯುಟಿಲಿಟಿ ಪ್ಯಾಕೇಜ್ ಅಡಿಯಲ್ಲಿ ಬಿಡಿಭಾಗಗಳನ್ನು ಒದಗಿಸುತ್ತಿದೆ.

ಹೋಂಡಾ ಅಮೇಜ್ ಫೇಸ್‌ಲಿಫ್ಟ್ ಗ್ರಾಹಕರನ್ನು ಸಾಕಷ್ಟು ಆಕರ್ಷಿಸುವ ವ್ಯವಸ್ಥೆಯನ್ನು ಹೊಂದಿದ್ದು, ಅಮೇಜ್ ಪ್ರೊಜೆಕ್ಟರ್ ಹೆಡ್‌ಲ್ಯಾಂಪ್ ಸೆಟಪ್ ಅನ್ನು ಪಡೆಯುತ್ತದೆ. ಇದು ಹಿಂದಿನ ಆವೃತ್ತಿಯಲ್ಲಿ ಸ್ಥಾಪಿಸಲಾದ ಹ್ಯಾಲೊಜೆನ್‌ಗೆ ಹೋಲಿಸಿದರೆ ಅಪ್‌ಗ್ರೇಡ್ ಆಗಿದೆ.

ಹೊಸ ಅಮೇಜ್ ಎಲ್‌ಇಡಿ ಟೈಲ್ ಲ್ಯಾಂಪ್‌ಗಳೊಂದಿಗೆ ಬರುತ್ತದೆ. ಆದಾಗ್ಯೂ, ರಿವರ್ಸ್‌ ಲೈಟ್ ಮತ್ತು ಬ್ರೇಕ್ ಲೈಟ್‌ ಹ್ಯಾಲೊಜಿನ್ ಆಗಿ ಮುಂದುವರಿಯುತ್ತದೆ.

ಹೋಂಡಾ ಅಮೇಜ್ 2021ರಲ್ಲಿ ಹೊಸತೇನಿದೆ?
2021 ಹೋಂಡಾ ಅಮೇಜ್ ಹೊಸ ಗ್ರಿಲ್ ಅನ್ನು ಪಡೆಯುತ್ತದೆ, ಕ್ರೋಮ್ ಸ್ಲೇಟ್, ಎಲ್ಇಡಿ ಪ್ರೊಜೆಕ್ಟರ್ ಹೆಡ್‌ಲೈಟ್, ಎಲ್ಇಡಿ ಡಿಆರ್‌ಎಲ್‌ಗಳು, ಎಲ್ಇಡಿ ಮುಂಭಾಗದ ಫಾಗ್ ಲ್ಯಾಂಪ್ ಮತ್ತು 15 ಇಂಚಿನ ಡೈಮಂಡ್ ಕಟ್ ವ್ಹೀಲ್, ಕ್ರೋಮ್ ಅನ್ನು ಅದರ ಹೊರಭಾಗದಲ್ಲಿ ಅನೇಕ ಕಡೆಗಳಲ್ಲಿ ಬಳಸಲಾಗಿದ್ದು, ಇದು ಕಾರಿಗೆ ಪ್ರೀಮಿಯಂ ಲುಕ್ ನೀಡುತ್ತದೆ. ಇದರೊಂದಿಗೆ, ಅಮೇಜ್ ಒಳಭಾಗದಲ್ಲಿ ಹಲವು ಬದಲಾವಣೆಗಳನ್ನು ಸಹ ಮಾಡಲಾಗಿದೆ.

ಇದು ಹೊಸ ಡ್ಯಾಶ್‌ಬೋರ್ಡ್, 7 ಇಂಚಿನ ಟಚ್‌ಸ್ಕ್ರೀನ್ ಇನ್ಫೋಟೈನ್‌ಮೆಂಟ್ ಸಿಸ್ಟಮ್, ಆಪಲ್ ಕಾರ್ ಪ್ಲೇ ಮತ್ತು ಆಂಡ್ರಾಯ್ಡ್ ಆಟೋ ಮತ್ತು ಸನ್ ರೂಫ್ ಅನ್ನು ಪಡೆಯುತ್ತದೆ. ಇದರೊಂದಿಗೆ ಸಿಟಿಯಂತೆ ಅಲೆಕ್ಸಾ ವಾಯ್ಸ್ ಸಪೋರ್ಟ್ ಫೀಚರ್ ಕೂಡ ಈ ಸೆಡಾನ್ ನಲ್ಲಿ ನೀಡಲಾಗಿದೆ. ಇದರೊಂದಿಗೆ ಹಿಂಭಾಗದ ಪಾರ್ಕಿಂಗ್ ಕ್ಯಾಮೆರಾ, ಪುಶ್ ಬಟನ್ ಸ್ಟಾರ್ಟ್, ಕ್ಲೈಮೇಟ್ ಕಂಟ್ರೋಲ್ ಇತ್ಯಾದಿಗಳನ್ನು ನೀಡಲಾಗಿದೆ.