5 ವರ್ಷದಲ್ಲಿ 3.3 ಲಕ್ಷ ಕೋಟಿ ಲಾಭ; ಷೇರುದಾರರಿಗೆ 2.3 ಲಕ್ಷ ಕೋಟಿ ವಾಪಸ್
ಷೇರು ಮಾರ್ಕೆಟ್, ಅಲ್ಲಿನ ವಹಿವಾಟು, ಕಂಪೆನಿಗಳು, ಅವುಗಳು ನೀಡುವ ಲಾಭಾಂಶ, ಬೆಳವಣಿಗೆ ವೇಗ ಇವೆಲ್ಲದರ ಬಗ್ಗೆ ಆಸಕ್ತಿ ಮೂಡಿಸುವಂಥ ವರದಿ ಇದು. ಭಾರತದ ಐ.ಟಿ. (ಮಾಹಿತಿ ತಂತ್ರಜ್ಞಾನ) ಕಂಪೆನಿಗಳು ಕಳೆದ ಐದು ವರ್ಷದಲ್ಲಿ ಹೂಡಿಕೆದಾರರ ವಿಚಾರದಲ್ಲಿ ಅದೆಷ್ಟು ಉದಾರಿಗಳಾಗಿವೆ ಗೊತ್ತೆ? ಆ ಕಂಪೆನಿಗಳಿಗೆ ಬರುವ ಲಾಭದಲ್ಲಿ ಶೇಕಡಾ 70ರಷ್ಟನ್ನು ಹೂಡಿಕೆದಾರರಿಗೆ ಹಿಂತಿರುಗಿಸಿವೆ.
2016ನೇ ಇಸವಿಯಿಂದ 2020ರ ಮಧ್ಯೆ ಐದು ವರ್ಷದಲ್ಲಿ ಭಾರತದ ಟಾಪ್ 5 ಐ.ಟಿ. ಕಂಪೆನಿಗಳಾದ ಟಿಸಿಎಸ್, ಇನ್ಫೋಸಿಸ್, ಎಚ್ ಸಿಎಲ್ ಟೆಕ್, ವಿಪ್ರೋ ಮತ್ತು ಟೆಕ್ ಮಹೀಂದ್ರಾ ಇವೆಲ್ಲವೂ ಸೇರಿ ಒಟ್ಟು 3.3 ಲಕ್ಷ ಕೋಟಿ ರುಪಾಯಿ ಲಾಭ ಮಾಡಿವೆ. ಆ ಪೈಕಿ 2.3 ಲಕ್ಷ ಕೋಟಿ ರುಪಾಯಿಯನ್ನು ಷೇರುದಾರರಿಗೆ ನೀಡಿವೆ ಎಂದು ಬ್ರೋಕರೇಜ್ ಹಾಗೂ ರೀಸರ್ಚ್ ಸಂಸ್ಥೆ ಮೋತಿಲಾಲ್ ಓಸ್ವಾಲ್ ಹೇಳಿದೆ.
ಷೇರು ಮಾರುಕಟ್ಟೆಯ 'ಗ್ರೇಟರ್ ಫೂಲ್ ಥಿಯರಿ' ಬಗ್ಗೆ ನಿಮಗೆಷ್ಟು ಗೊತ್ತು?
ಕಳೆದ ಐದು ವರ್ಷದಲ್ಲಿ ಟಿಸಿಎಸ್ ಕಂಪೆನಿಯೊಂದೇ ಷೇರುದಾರರಿಗೆ 1.1 ಲಕ್ಷ ಕೋಟಿ ರುಪಾಯಿ ನೀಡಿದೆ. ಆ ನಂತರ ಇನ್ಫೋಸಿಸ್ 65,000 ಕೋಟಿ, ವಿಪ್ರೋ 30,000 ಕೋಟಿ, ಎಚ್ ಸಿಎಲ್ ಟೆಕ್ನಾಲಜೀಸ್ 17,000 ಕೋಟಿ ಮತ್ತು ಟೆಕ್ ಮಹೀಂದ್ರಾ 8600 ಕೋಟಿ ರುಪಾಯಿಯನ್ನು ಹೂಡಿಕೆದಾರರಿಗೆ ಮರಳಿಸಿವೆ.
ಆಸಕ್ತಿಕರ ಸಂಗತಿ ಏನೆಂದರೆ ಇ ಯಾವ ಕಂಪೆನಿಯೂ 2016ರಿಂದ 2020ರ ಮಧ್ಯೆ ಎರಡಂಕಿಯ ಲಾಭದ CAGR ನೀಡಿಲ್ಲ. ಅತಿ ಹೆಚ್ಚು ಅಂದರೆ ಎಚ್ ಸಿಎಲ್ ಟೆಕ್ನಾಲಜೀಸ್ 9 ಪರ್ಸೆಂಟ್, ವಿಪ್ರೋ ಅತ್ಯಂತ ಕಡಿಮೆ ಅಂದರೆ 2 ಪರ್ಸೆಂಟ್ ತೆರಿಗೆ ಪಾವತಿಸಿದ ನಂತರ CAGR ಇದೆ.