ಐಆರ್ ಸಿಟಿಸಿ ಷೇರುಗಳು 4 ತಿಂಗಳಲ್ಲಿ 500 ಪರ್ಸೆಂಟ್ ರಿಟರ್ನ್ಸ್

ಐಆರ್ ಸಿಟಿಸಿ ಷೇರುಗಳು ಗುರುವಾರ 52 ವಾರಗಳ ಗರಿಷ್ಠ ಮಟ್ಟ, ಪ್ರತಿ ಷೇರಿನ ಬೆಲೆ 1976 ರುಪಾಯಿಯನ್ನು ತಲುಪಿತ್ತು. ಐಪಿಒನಲ್ಲಿ ಈ ಷೇರು ಖರೀದಿ ಮಾಡಿದವರಿಗೆ ಲಿಸ್ಟಿಂಗ್ ಆದ ನಂತರ 500 ಪರ್ಸೆಂಟ್ ರಿಟರ್ನ್ಸ್ ಕೊಟ್ಟಿದೆ. ಬಿಎಸ್ ಇ ಸೂಚ್ಯಂಕದಲ್ಲಿ ಗುರುವಾರ 5.30 ಪರ್ಸೆಂಟ್ ಏರಿಕೆ ಕಂಡು ದಿನಾಂತ್ಯಕ್ಕೆ ರು. 1927.75ಗೆ ವಹಿವಾಟು ಮುಗಿಸಿದೆ.

ಈ ಷೇರಿನ ಮೇಲೆ ರು. 5.93 ಲಕ್ಷ ಹೂಡಿದ್ದರೆ ಆರು ವರ್ಷದಲ್ಲಿ ಕೋಟಿ ರುಪಾಯಿ

ಕಳೆದ ವರ್ಷದ ಅಕ್ಟೋಬರ್ 14ನೇ ತಾರೀಕು ಐಆರ್ ಸಿಟಿಸಿ ಷೇರು ಲಿಸ್ಟಿಂಗ್ ಆಗಿತ್ತು. 320 ರುಪಾಯಿ ಐಪಿಒ ಬೆಲೆಗೆ ವಿತರಣೆ ಆಗಿದ್ದು, ಲಿಸ್ಟಿಂಗ್ ಆದ ದಿನ 101.25% ಪ್ರೀಮಿಯಂ 644 ರುಪಾಯಿಗೆ ವಹಿವಾಟು ನಡೆಸಿತ್ತು. ಮೂರನೇ ತ್ರೈಮಾಸಿಕದಲ್ಲಿ ಕಳೆದ ವರ್ಷಕ್ಕೆ ಹೋಲಿಸಿದರೆ ಐಆರ್ ಸಿಟಿಸಿ ನಿವ್ವಳ ಲಾಭ 179.6 ಪರ್ಸೆಂಟ್ ಏರಿಕೆ ಆಗಿದೆ.

ಐಆರ್ ಸಿಟಿಸಿಯಿಂದ ಗುರುವಾರ ಕಾಶಿ ಮಹಾಕಾಲ್ ಎಕ್ಸ್ ಪ್ರೆಸ್ ನ ವಾಣಿಜ್ಯ ಕಾರ್ಯಚಟುವಟಿಕೆ ಆರಂಭವಾಯಿತು. ಈ ರೈಲು ವಾರಾಣಸಿ ಮತ್ತು ಇಂದೋರ್ ಮಧ್ಯೆ ಸಂಚರಿಸುತ್ತದೆ. ಜ್ಯೋತಿರ್ಲಿಂಗಗಳಿರುವ ಮೂರು ಪವಿತ್ರ ಸ್ಥಳಗಳನ್ನು ಈ ರೈಲು ಸಂಪರ್ಕಿಸುತ್ತದೆ. ಇನ್ನು ಐಆರ್ ಸಿಟಿಸಿಯಿಂದ 10 ರುಪಾಯಿ ಮಧ್ಯಂತರ ಲಾಭಾಂಶ ಘೋಷಣೆ ಮಾಡಿದ್ದು, ಅದಕ್ಕೆ ಫೆಬ್ರವರಿ 25, 2020ರ ದಿನಾಂಕ ನಿಗದಿ ಮಾಡಲಾಗಿದೆ.