ಈ ನೈಟ್ ಕ್ಲಬ್ ನಲ್ಲಿ ಸಂಸ್ಕೃತ ಹಾಡು, ವೆಜ್ ಫುಡ್, ಸಿಗರೇಟ್- ಲಿಕ್ಕರ್ ನಾಟ್ ಅಲೋಡ್

ಭಾರತದ ನೈಟ್ ಕ್ಲಬ್ ಗಳು ಹೇಗಿರುತ್ತದೆ ಎಂಬ ಬಗ್ಗೆ ನಿಮಗೇನಾದರೂ ಗೊತ್ತಿದೆಯಾ? ನೀವೇನಾದರೂ ಹೋಗಿದ್ದರೆ ಅಥವಾ ಸಿನಿಮಾಗಳಲ್ಲಿ ನೋಡಿದ್ದರೆ ಗೊತ್ತಿರಬಹುದು. ಅಲ್ಲಿ ಹಿಂದಿ, ಪಂಜಾಬಿ ಅಥವಾ ಇಂಗ್ಲಿಷ್ ಹಾಡುಗಳನ್ನು ಹಾಕಲಾಗುತ್ತದೆ. ಅಲ್ಲಿ ಇಡೀ ರಾತ್ರಿ ಆ ಹಾಡುಗಳಿಗೆ ಹೆಜ್ಜೆ ಹಾಕಲಾಗುತ್ತದೆ. ಆದರೆ ಭಾರತದಿಂದ ದೂರದಲ್ಲಿ ಇರುವ ದೇಶವೊಂದರಲ್ಲಿ ವಿಶಿಷ್ಟವಾದ ನೈಟ್ ಕ್ಲಬ್ ವೊಂದಿದೆ. ಇಲ್ಲಿ ಜನರು ಸಂಸ್ಕೃತ ಹಾಡಿಗೆ ಕುಣಿಯುತ್ತಾರೆ, ಸಸ್ಯಾಹಾರ ಮಾತ್ರ ಸೇವಿಸುತ್ತಾರೆ.

ಅಂಥ ದೇಶ ಯಾವುದಪ್ಪ ಅಂತೀರಾ? ಆ ದೇಶದ ಹೆಸರು ಅರ್ಜೆಂಟಿನಾ. ಆ ನೈಟ್ ಕ್ಲಬ್ ನ ಹೆಸರು ಗ್ರೋವ್. ಆ ಕ್ಲಬ್ ಇರುವುದು ಅರ್ಜೆಂಟಿನಾದ ರಾಜಧಾನಿ ಬ್ಯೂನಸ್ ಐರಸ್ ನಲ್ಲಿ. ಇಲ್ಲಿ ಗಣೇಶ ಶರಣಂ, ಗೋವಿಂದ- ಗೋವಿಂದ, ಜೈ ಜೈ ರಾಧಾ ರಮಣ್ ಹರಿ ಬೋಲ್ ಮತ್ತು ಜೈ ಕೃಷ್ಣ ಹರೇ (ಎಲ್ಲವೂ ಭಕ್ತಿ ಗೀತೆಗಳು) ಹಾಕಲಾಗುತ್ತದೆ. ಜನರು ಈ ಹಾಡುಗಳಿಗೇ ಡ್ಯಾನ್ಸ್ ಮಾಡುತ್ತಾರೆ.

ಯಾವುದೇ ದಿನದಲ್ಲೂ ಬ್ಯೂನಸ್ ಐರಸ್ ನ ಈ ಕ್ಲಬ್ ನಲ್ಲಿ ರಾತ್ರಿ ವೇಳೆ 800 ಜನರಷ್ಟು ಸಂಖ್ಯೆ ಇರುತ್ತದೆ. ಭಾರತದ ರಾಜತಾಂತ್ರಿಕ ಅಧಿಕಾರಿ ವಿಶ್ವನಾಥನ್ ಅವರು ಈ ಕ್ಲಬ್ ಗೆ 2012ರಲ್ಲಿ ಭೇಟಿ ನೀಡಿ, ತಮ್ಮ ಅನುಭವ ಹಂಚಿಕೊಂಡಿದ್ದರು. ಈ ನೈಟ್ ಕ್ಲಬ್ ನಲ್ಲಿ ಜನರು ಮದ್ಯ- ತಂಬಾಕು ಸೇವನೆ ಕೂಡ ಮಾಡುವ ಹಾಗಿಲ್ಲ.

ಅಷ್ಟೇ ಅಲ್ಲ, ಇಲ್ಲಿ ಮಾದಕ ವಸ್ತುಗಳನ್ನು ನಿಷೇಧಿಸಲಾಗಿದೆ. ಮಾಂಸ ಹಾಗೂ ಮೀನು ಕೂಡ ತಿನ್ನುವಂತಿಲ್ಲ. ಸಾಫ್ಟ್ ಡ್ರಿಂಕ್ಸ್, ಹಣ್ಣಿನ ರಸ ಮತ್ತು ಸಸ್ಯಾಹಾರ ಮಾತ್ರ ದೊರೆಯುತ್ತದೆ.