'ಕರಡಿ ಹಿಡಿತ'ದಲ್ಲಿ ಷೇರು ಮಾರುಕಟ್ಟೆ: 1448 ಪಾಯಿಂಟ್ ಕುಸಿದ ಸೆನ್ಸೆಕ್ಸ್
ಜಾಗತಿಕ ಮಾರುಕಟ್ಟೆಯ ಪ್ರಭಾವ ಶುಕ್ರವಾರದಂದು ಭಾರತೀಯ ಷೇರು ಮಾರುಕಟ್ಟೆ ಮೇಲೂ ಆಯಿತು. ಅದರ ಪರಿಣಾಮವಾಗಿ ಸತತ ಆರನೇ ದಿನ ಕೂಡ ಇಳಿಕೆ ದಾಖಲಿಸಿತು. ಬರೀ ಇಳಿಕೆಯಲ್ಲ, ಭಾರೀ ಕುಸಿತವನ್ನೇ ದಾಖಲಿಸಿತು. ಬಿಎಸ್ ಇ ಸೆನ್ಸೆಕ್ಸ್ 1448.37 ಪಾಯಿಂಟ್ ಇಳಿದು, 38,297.29 ಪಾಯಿಂಟ್ ಗಳಿಗೆ ದಿನದ ಹಾಗೂ ಫೆಬ್ರವರಿ ತಿಂಗಳ ವಹಿವಾಟು ಚುಕ್ತಾ ಮಾಡಿತು.
ಷೇರು ಮಾರ್ಕೆಟ್ ನಲ್ಲಿ ರಕ್ತದೋಕುಳಿ; ಕ್ಷಣದಲ್ಲಿ ಕರಗಿತು 3.5 ಲಕ್ಷ ಕೋಟಿ
ಇನ್ನು ನಿಫ್ಟಿ 50 ಸೂಚ್ಯಂಕವು 431.55 ಅಂಶಗಳಷ್ಟು ಕುಸಿದು, 11,201.75 ಪಾಯಿಂಟ್ ನೊಂದಿಗೆ ವಹಿವಾಟು ಕೊನೆಗೊಳಿಸಿತು. 2015ರ ಆಗಸ್ಟ್ ನಂತರ ಒಂದು ದಿನದಲ್ಲಿ ಕಂಡ ಅತಿ ದೊಡ್ಡ ಕುಸಿತ ಇದಾಗಿದೆ. 2008ರ ಆರ್ಥಿಕ ಕುಸಿತದ ನಂತರ ಜಾಗತಿಕ ಷೇರು ಮಾರುಕಟ್ಟೆಯು ಕಂಡ ತುಂಬ ನಷ್ಟದ ವಾರ ಇದಾಗಿದೆ.
ಕೊರೊನಾ ವೈರಾಣು ವಿಶ್ವದಾದ್ಯಂತ ಹಬ್ಬುತ್ತಿರುವುದು ಆತಂಕ ಸೃಷ್ಟಿಸಿದೆ. ಪ್ರಮುಖ ಸೂಚ್ಯಂಕಗಳು ನಷ್ಟ ದಾಖಲಿಸಿದ್ದು, ಗರಿಷ್ಠ ಮಟ್ಟದಿಂದ 10 ಪರ್ಸೆಂಟ್ ಇಳಿದಿದೆ. ಜಪಾನ್, ಚೀನಾ, ಹಾಂಕಾಂಗ್, ದಕ್ಷಿಣ ಕೊರಿಯಾ ಮಾತ್ರ ಅಲ್ಲದೆ, ಆಸ್ಟ್ರೇಲಿಯಾ, ಯುರೋಪ್ ಮತ್ತು ಯು.ಎಸ್. ಷೇರು ಮಾರ್ಕೆಟ್ ಕೂಡ ಕುಸಿದಿವೆ.