ಯೆಸ್ ಬ್ಯಾಂಕ್ ನಿಂದ FPO ಮೂಲಕ 15,000 ಕೋಟಿ ತನಕ ಸಂಗ್ರಹ

ಖಾಸಗಿ ವಲಯದ ಯೆಸ್ ಬ್ಯಾಂಕ್ ಫಾಲೋ- ಆನ್ ಪಬ್ಲಿಕ್ ಆಫರ್ (FPO) ಮೂಲಕ 15,000 ಕೋಟಿ ತನಕ ಹಣ ಸಂಗ್ರಹಿಸಲು ಮುಂದಾಗಿದೆ. ಅದಕ್ಕಾಗಿ ಪ್ರತಿ ಷೇರಿಗೆ ಫ್ಲೋರ್ ಪ್ರೈಸ್ (ಮೂಲ ದರ) 12 ರುಪಾಯಿ ನಿಗದಿ ಮಾಡಿದ್ದು, ಜುಲೈ 15ನೇ ತಾರೀಕಿನಿಂದ ಇದು ಆರಂಭ ಆಗಲಿದೆ.

ಬ್ಯಾಂಕ್ ಆಡಳಿತ ಮಂಡಳಿಯ ಬಂಡವಾಳ ಸಂಗ್ರಹ ಸಮಿತಿ (CRC) ಸಭೆಯಲ್ಲಿ ಪ್ರತಿ ಷೇರಿಗೆ ಮೂಲ ಬೆಲೆ 12 ರುಪಾಯಿ ನಿಗದಿ ಮಾಡಲು ಒಪ್ಪಿಗೆ ಸೂಚಿಸಿತು ಎಂದು ಯೆಸ್ ಬ್ಯಾಂಕ್ ನಿಂದ ಬಿಎಸ್ ಇ ಪೈಲಿಂಗ್ ನಲ್ಲಿ ತಿಳಿಸಲಾಗಿದೆ. ಎಫ್ ಪಿಒದ ಗರಿಷ್ಠ ದರವು ಪ್ರತಿ ಷೇರಿಗೆ 13 ರುಪಾಯಿ.

ಸಾಲ ತೀರಿಸದ ಡಿಶ್ ಟಿವಿಯ 24.19 ಪರ್ಸೆಂಟ್ ಷೇರನ್ನು ಸ್ವಾಧೀನಪಡಿಸಿಕೊಂಡ ಯೆಸ್ ಬ್ಯಾಂಕ್

ಇನ್ನು ಕನಿಷ್ಠ 1000 ಷೇರುಗಳಿಗೆ ಅರ್ಜಿ ಹಾಕಬೇಕು. ಅದಕ್ಕಿಂತ ಹೆಚ್ಚಿನದು ಬೇಕಿದ್ದಲ್ಲಿ 1000 ಷೇರುಗಳ ಗುಣಕದಲ್ಲಿ ಹೆಚ್ಚಿಸಿ ಅರ್ಜಿ ಹಾಕಿಕೊಳ್ಳಬೇಕು. ಇನ್ನು ಬ್ಯಾಂಕ್ ಉದ್ಯೋಗಿಯಾಗಿದ್ದಲ್ಲಿ, ಅರ್ಹ ಸಿಬ್ಬಂದಿಗೆ ನಿಗದಿಯಾಗಿರುವ ಪ್ರಮಾಣದಲ್ಲಿ ಪ್ರತಿ ಷೇರಿಗೆ 1 ರುಪಾಯಿ ರಿಯಾಯಿತಿ ದೊರೆಯಲಿದೆ.

ಯೆಸ್ ಬ್ಯಾಂಕ್ ಎಫ್ ಪಿಒ ಜುಲೈ 15, 2020ಕ್ಕೆ ಶುರುವಾದರೆ, ಜುಲೈ 17, 2020ಕ್ಕೆ ಕೊನೆಯಾಗುತ್ತದೆ. ಬ್ಯಾಂಕ್ ಸಿಬ್ಬಂದಿಗೆ 200 ಕೋಟಿ ರುಪಾಯಿ ಮೌಲ್ಯದ ಷೇರುಗಳು ಮೀಸಲಿರಿಸಲಾಗಿದೆ. ಯೆಸ್ ಬ್ಯಾಂಕ್ ಷೇರಿನ ಬೆಲೆ ಬಿಎಸ್ ಇಯಲ್ಲಿ ಶುಕ್ರವಾರ (ಜುಲೈ 10, 2020) ಐದು ಪರ್ಸೆಂಟ್ ಇಳಿಕೆ ಕಂಡು, 25.30 ರುಪಾಯಿಗೆ ವಹಿವಾಟು ಮುಗಿಸಿತು.