ಈ ಹೆದ್ದಾರಿಯ 3 ಟೋಲ್ ನಿಂದ 4 ವರ್ಷದಲ್ಲಿ 2500 ಕೋಟಿ ಸಂಗ್ರಹ

ಗುರುಗ್ರಾಮ- ಜೈಪುರ್ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಂಗ್ರಹ ಆಗಿರುವ ಟೋಲ್ ಮೊತ್ತ ಎಷ್ಟು ಗೊತ್ತಾ? 2500 ಕೋಟಿ ರುಪಾಯಿ. ಹೆದ್ದಾರಿ ಹಾಗೂ ರಸ್ತೆ ಸಾರಿಗೆ ಸಚಿವಾಲಯದಿಂದ ನಾಲ್ಕು ವರ್ಷದ ಹಿಂದೆ ಈ ಹೆದ್ದಾರಿಯಲ್ಲಿ ಟೋಲ್ ಸಂಗ್ರಹಿಸಲು ಆರಂಭಿಸಲಾಗಿತ್ತು. ಈ ಹೆದ್ದಾರಿಯನ್ನು NH8 ಅಂತಲೇ ಕರೆಯಲಾಗುತ್ತದೆ. ಮೂರು ಕಡೆಗಳಲ್ಲಿ ಟೋಲ್ ಸಂಗ್ರಹಿಸಲಾಗುತ್ತದೆ.

2016-17ನೇ ಸಾಲಿನ ಆರ್ಥಿಕ ವರ್ಷದಿಂದ 2020ರ ಫೆಬ್ರವರಿ ತನಕ 2500 ಕೋಟಿ ರುಪಾಯಿಯಷ್ಟು ಸುಂಕ ವಸೂಲಿ ಮಾಡಲಾಗಿದೆ ಎಂದು ಕೇಂದ್ರ ಸಚಿವ ನಿತಿನ್ ಗಡ್ಕರಿ ಸೋಮವಾರದಂದು ರಾಜ್ಯಸಭೆಯಲ್ಲಿ ಲಿಖಿತ ಉತ್ತರ ನೀಡಿದ್ದಾರೆ. ಈ ಟೋಲ್ ಪ್ಲಾಜಾಗಳು ಶಹಜಹಾನ್ ಪುರ್, ಮನೋಹರ್ ಪುರ್ ಹಾಗೂ ದೌಲತ್ ಪುರ ಪ್ರದೇಶಗಳಿವೆ. ಇವುಗಳು ಬಿಒಟಿ (ಬಿಲ್ಟ್ ಆಪರೇಟ್ ಅಂಡ್ ಟ್ರಾನ್ಸ್ ಫರ್) ಮಾದರಿಯಲ್ಲಿ ಕಾರ್ಯನಿರ್ವಹಿಸುತ್ತವೆ.

ಇನ್ನು ಯಾವ ವರ್ಷದಲ್ಲಿ ಎಷ್ಟು ಸುಂಕ ಸಂಗ್ರಹ ಆಗಿದೆ ಎಂಬ ಬಗ್ಗೆಯೂ ನಿತಿನ್ ಗಡ್ಕರಿ ಮಾಹಿತಿ ನೀಡಿದ್ದಾರೆ. 2016-17: 569 ಕೋಟಿ, 2017-18: 666 ಕೋಟಿ, 2018-19: 708 ಕೋಟಿ ಹಾಗೂ 2020ರ ಫೆಬ್ರವರಿ ತನಕದ ಸುಂಕ ವಸೂಲಾತಿ ಕಡಿಮೆ, ಅಂದರೆ 555 ಕೋಟಿ ರುಪಾಯಿ ಆಗಿದೆ.