ವಿಶ್ವದ ಅತಿದೊಡ್ಡ ಚಿನ್ನದ ಆಮದುದಾರ, ಭಾರತದ ಚಿನ್ನದ ಆಮದು ಕುಸಿತ

ವಿಶ್ವದ ಅತಿದೊಡ್ಡ ಚಿನ್ನದ ಆಮದುದಾರ ದೇಶವಾದ ಭಾರತವು, ಅನೇಕ ವರ್ಷದ ಬಳಿಕ ಚಿನ್ನದ ಆಮದು ಇಳಿಕೆ ಕಂಡಿದೆ. ಭಾರತದ ಚಿನ್ನದ ಆಮದು ಪ್ರಮಾಣ ಏಪ್ರಿಲ್-ನವೆಂಬರ್ 2019ರಲ್ಲಿ 7 ಪರ್ಸೆಂಟ್ ಕುಸಿದಿದೆ.

2019-20ರ ಹಣಕಾಸು ವರ್ಷದಲ್ಲಿ ಮೌಲ್ಯದ ಲೆಕ್ಕದಲ್ಲಿ ಆಮದು ಪ್ರಮಾಣವು 1.43 ಲಕ್ಷ ಕೋಟಿಗಳಷ್ಟಿದೆ (106.84 ಬಿಲಿಯನ್ ಅಮೆರಿಕನ್ ಡಾಲರ್) ಎಂದು ವಾಣಿಜ್ಯ ಸಚಿವಾಲಯ ಹೇಳಿದೆ. ಆದರೆ ಹಿಂದಿನ ವರ್ಷ ಇದೇ ಅವಧಿಯಲ್ಲಿ ಆಮದು ಪ್ರಮಾಣವು 1.55 ಲಕ್ಷ ಕೋಟಿ ಕೋಟಿ ರುಪಾಯಿಗಳಷ್ಟಿತ್ತು. (133.74 ಬಿಲಿಯನ್ ಅಮೆರಿಕನ್ ಡಾಲರ್)

ಭಾರತವು ಚಿನ್ನದ ಆಮದು ಮಾಡಿಕೊಳ್ಳುವ ಅತಿದೊಡ್ಡ ದೇಶವಾಗಿದ್ದು, ವಾರ್ಷಿಕ ಸುಮಾರು 800 ರಿಂದ 900 ಟನ್‌ಗಳಷ್ಟು ಆಮದು ಮಾಡಿಕೊಳ್ಳಲಾಗುತ್ತದೆ. ಇದರಲ್ಲಿ ಬಹುಪಾಲು ಚಿನ್ನವು ಆಭರಣಗಳ ತಯಾರಿಕೆಗೆ ಬಳಕೆಯಾಗುತ್ತದೆ.

2019-20ರಲ್ಲಿ ಎಂಟು ತಿಂಗಳ ಅವಧಿಯಲ್ಲಿ (ಏಪ್ರಿಲ್-ನವೆಂಬರ್) ಚಿನ್ನದ ಆಮದು ಪ್ರಮಾಣವು ಕಡಿಮೆಯಾಗಿರುವುದರಿಂದ ದೇಶದ ವ್ಯಾಪಾರ ಕೊರತೆಯು ಎಂಟು ತಿಂಗಳ ಅವಧಿಯಲ್ಲಿ 7.47 ಲಕ್ಷ ಕೋಟಿಗಳಿಗೆ ಇಳಿಯಲಿದೆ. ವರ್ಷದ ಹಿಂದಿನ ಇದೇ ಅವಧಿಯಲ್ಲಿ ಇದು 9.36 ಲಕ್ಷ ಕೋಟಿ ರುಪಾಯಿಗಳಷ್ಟಿತ್ತು.

ವ್ಯಾಪಾರ ಕೊರತೆ ಮತ್ತು ಚಾಲ್ತಿ ಖಾತೆ ಕೊರತೆ ಮೇಲಿನ ಪ್ರತಿಕೂಲ ಪರಿಣಾಮ ತಗ್ಗಿಸಲು ಬಜೆಟ್‌ನಲ್ಲಿ ಆಮದು ಸುಂಕವನ್ನು 10 ಪರ್ಸೆಂಟ್ ನಿಂದ 12.5ಕ್ಕೆ ಹೆಚ್ಚಿಸಲಾಯಿತು. ಹೀಗಾಗಿ ಜುಲೈನಿಂದ ಚಿನ್ನದ ಆಮದು ಇಳಿಕೆ ಕಂಡಿದೆ.