ಕುವೈತ್ ಉದ್ಯೋಗದ ಕನಸು ಕಂಡವರಿಗೆ ಶಾಕಿಂಗ್ ನ್ಯೂಸ್

ಕುವೈತ್ ನಲ್ಲಿರುವ ವಲಸಿಗರ ಜನಸಂಖ್ಯೆ ಪ್ರಮಾಣವನ್ನು 70ರಿಂದ 30 ಪರ್ಸೆಂಟ್ ಗೆ ಇಳಿಸಲು ತೀರ್ಮಾನಿಸಲಾಗಿದೆ. ಜನಸಂಖ್ಯೆ ಅಸಮಾನತೆಯನ್ನು ನಿವಾರಿಸುವ ಸಲುವಾಗಿ ಈ ತೀರ್ಮಾನಕ್ಕೆ ಬರಲಾಗಿದೆ ಎಂದು ಪ್ರಧಾನಮಂತ್ರಿ ಬುಧವಾರ ತಿಳಿಸಿದ್ದಾರೆ. ಗಲ್ಫ್ ಅರಬ್ ನ ಇತರೆಡೆಗಳಲ್ಲಿ ಇರುವಂತೆಯೇ ಕುವೈತ್ ನಲ್ಲಿ ವಿದೇಶಿಗರ ಸಂಖ್ಯೆ ಹೆಚ್ಚು. ಅದರಲ್ಲೂ ಮಧ್ಯಪ್ರಾಚ್ಯ ಹಾಗೂ ಏಷ್ಯಾದ ಕಾರ್ಮಿಕರ ಸಂಖ್ಯೆ ಹೆಚ್ಚು.

ಕುವೈತ್ ಒಟ್ಟು ಜನಸಂಖ್ಯೆ 48 ಲಕ್ಷ ಇದ್ದರೆ, ಅದರಲ್ಲಿ ವಿದೇಶಿಗರು 33 ಲಕ್ಷ ಇದ್ದಾರೆ ಎಂದು ಪ್ರಧಾನಿ ಸಬಾ ಅಲ್- ಖಲೇದ್ ಅಲ್- ಹಮದ್ ಅಲ್- ಸಬಾ ತಿಳಿಸಿದ್ದಾರೆ. ಕುವೈತ್ ಮೂಲ ನಿವಾಸಿಗಳು 70 ಪರ್ಸೆಂಟ್ ಹಾಗೂ ಹೊರಗಿನವರು 30 ಪರ್ಸೆಂಟ್ ಇದ್ದಲ್ಲಿ ಅದು ಸರಿಯಾದ ಲೆಕ್ಕಾಚಾರ ಆಗುತ್ತದೆ ಎಂದು ಸ್ಥಳೀಯ ನಿಯತಕಾಲಿಕೆಗಳ ಸಂಪಾದಕರ ಜತೆಗಿನ ಸಭೆಯಲ್ಲಿ ಹೇಳಿದ್ದಾರೆ.

ಈ ಜನಸಂಖ್ಯೆ ಅಸಮತೋಲನವನ್ನು ಸರಿಪಡಿಸುವ ನಿಟ್ಟಿನಲ್ಲಿ ಭವಿಷ್ಯದಲ್ಲಿ ದೊಡ್ಡ ಸವಾಲು ಎದುರಿಸಲಿದ್ದೇವೆ ಎಂದು ಅವರು ಹೇಳಿದ್ದಾರೆ. ತೈಲ ಬೆಲೆಯಲ್ಲಿ ಭಾರೀ ಕುಸಿತ ಆಗಿರುವುದರಿಂದ ಕುವೈತ್ ಬಜೆಟ್ ಮೇಲೂ ಪರಿಣಾಮ ಆಗಿದೆ. ಆ ಕಾರಣಕ್ಕೆ ಕುವೈತ್ ಮೂಲ ನಿವಾಸಿಗಳಿಗೆ ಹೆಚ್ಚಿನ ಉದ್ಯೋಗ ಒದಗಿಸಬೇಕಾದ ದಾರಿ ಕಂಡುಕೊಳ್ಳಬೇಕಿದೆ.

ಕೊರೊನಾದಿಂದ ಉದ್ಭವಿಸಿರುವ ಬಿಕ್ಕಟ್ಟಿನ ಪರಿಣಾಮವಾಗಿ ಸರ್ಕಾರಿ ಸ್ವಾಮ್ಯದ ಕುವೈತ್ ಏರ್ ವೇಸ್ ನಿಂದ ಕಳೆದ ವಾರವಷ್ಟೇ ಸಾವಿರದೈನೂರು ವಲಸಿಗ ಉದ್ಯೋಗಿಗಳನ್ನು ಕೆಲಸದಿಂದ ತೆಗೆಯಲು ನಿರ್ಧರಿಸಲಾಗಿದೆ.