ಈ ಷೇರಿನ ಮೇಲೆ ಹೂಡಿದ್ದ 1.1 ಲಕ್ಷ ಒಂದೂ ಮುಕ್ಕಾಲು ವರ್ಷದಲ್ಲಿ 1.22 ಕೋಟಿ

ಅದೃಷ್ಟವಿದ್ದರೆ, ಜತೆಗಿಷ್ಟು ಪ್ರಯತ್ನ, ಧೈರ್ಯ ಇದ್ದರೆ ಹೀಗೂ ಆಗಬಹುದು. ಏಕೆಂದರೆ, ಷೇರು ಮಾರುಕಟ್ಟೆಯಲ್ಲಿ ಇಂಥ ಉದಾಹರಣೆಗಳು ಸಾಕಷ್ಟು ಸಿಗುತ್ತವೆ. ಈಗಿನ ಉದಾಹರಣೆ ಬೆಸ್ಟ್ ಆಗ್ರೋ ಲೈಫ್ ಲಿಮಿಟೆಡ್ ನದು. ಒಂದು ವರ್ಷದಲ್ಲಿ ಈ ಷೇರಿನ ಬೆಲೆ ಬೆಳೆದಿರುವ ವೇಗ ಗಮನಿಸಿದರೆ ಒಂದು ಕ್ಷಣ ಅಚ್ಚರಿ, ಗಾಬರಿ ಒಟ್ಟೊಟ್ಟಿಗೆ ಆಗುತ್ತದೆ.

ಬಿಎಸ್ ಇ ಸೂಚ್ಯಂಕದಲ್ಲಿ ಮಾತ್ರ ವಹಿವಾಟು ನಡೆಸುವ ಬೆಸ್ಟ್ ಆಗ್ರೋಲೈಫ್ ಷೇರಿನ ಸದ್ಯದ ಬೆಲೆ (ಡಿಸೆಂಬರ್ 20, ಶುಕ್ರವಾರ ವಹಿವಾಟು ಕೊನೆಗೊಳಿಸಿದ ಮೇಲೆ) 242 ರುಪಾಯಿ. ನೂರು ಷೇರುಗಳನ್ನು ಖರೀದಿ ಮಾಡಬೇಕು ಅಂದರೆ, 24,200 ರುಪಾಯಿ ಆಗುತ್ತದೆ. ಜನವರಿ 2, 2019ರಲ್ಲಿ ಈ ಷೇರಿನ ಬೆಲೆ ತಲಾ 11 ರುಪಾಯಿ ಇತ್ತು. 100 ಷೇರುಗಳನ್ನು ಖರೀದಿಸಬೇಕು ಅಂದರೆ 1,100 ರುಪಾಯಿ ಅಷ್ಟೇ.

ಬೆಸ್ಟ್ ಆಗ್ರೋಲೈಫ್ ನ ಸಾರ್ವಕಾಲಿಕ ಗರಿಷ್ಠ ಮಟ್ಟ ಮುಟ್ಟಿರುವುದು ನವೆಂಬರ್ 19, 2019ರಂದು. ಪ್ರತಿ ಷೇರಿಗೆ 278.05 ರುಪಾಯಿ. ನೂರು ಷೇರುಗಳನ್ನು ಖರೀದಿಸಲು 27,800 ರುಪಾಯಿ. ಹನ್ನೊಂದೂವರೆ ತಿಂಗಳ ಫಾಸಲೆಯಲ್ಲಿ 1,100 ರುಪಾಯಿ ಮೊತ್ತ 27,800 ರುಪಾಯಿ ಆಗಿದೆ.

ಏಪ್ರಿಲ್ 3, 2018ರಲ್ಲಿ ಬೆಸ್ಟ್ ಆಗ್ರೋ ಲೈಫ್ ನ ಷೇರಿನ ಬೆಲೆ 2.50 ರುಪಾಯಿ ಇತ್ತು. ಆಗಿನಿಂದ ಈ ವರ್ಷದ ಲೆಕ್ಕ ಹೇಳುವುದಾದರೆ ಯಾರಾದರೂ ಈ ಷೇರಿನ ಮೇಲೆ 1.1 ಲಕ್ಷ ರುಪಾಯಿ ಹೂಡಿಕೆ ಮಾಡಿದ್ದರೆ ನವೆಂಬರ್ 2019ಕ್ಕೆ 1,22,32,000 ರುಪಾಯಿ ಆಗಿರುತ್ತಿತ್ತು.

ಹೌದು, ನೀವು ಸರಿಯಾಗಿಯೇ ಓದಿಕೊಂಡಿದ್ದೀರಿ: ಒಂದು ಕೋಟಿ ಇಪ್ಪತ್ತೆರಡು ಲಕ್ಷ ರುಪಾಯಿ. ಹ್ಞಾಂ, ಒಂದು ಮಾತು. ಇಲ್ಲಿ ಕೊಟ್ಟಿರುವುದು ಉದಾಹರಣೆಯೇ ಹೊರತು. ಈ ಷೇರಿನ ಖರೀದಿಗೆ ನಮ್ಮ ಶಿಫಾರಸು ಅಲ್ಲ. ಯಾವುದೇ ಷೇರು ಹೂಡಿಕೆ ಮಾಡುವ ಮುನ್ನ ವಿವಿಧ ಅಂಶಗಳನ್ನು ಪರಿಗಣಿಸಬೇಕು. ಜತೆಗೆ ತಜ್ಞರ ಮಾರ್ಗದರ್ಶನ ಪಡೆದು, ಅಂತಿಮವಾಗಿ ನೀವೇ ನಿರ್ಧರಿಸಬೇಕು.