ನವರತ್ನ, ಮಹಾರತ್ನ ಷೇರುಗಳು ಕಡ್ಲೇಪುರಿ ಬೆಲೆಗೆ: ಇಲ್ಲಿವೆ 12 ಆಯ್ಕೆ

ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಲಿಮಿಟೆಡ್

ಈ ಕಂಪೆನಿಯು ಭಾರತತಕ್ಕೆ ಅಗತ್ಯ ಇರುವ ಸುಮಾರು ಶೇಕಡಾ 35ರಷ್ಟು ಪೆಟ್ರೋಲಿಯಂ ಉತ್ಪನ್ನಗಳನ್ನು ಪೂರೈಸುತ್ತಿದೆ. ಇತ್ತೀಚೆಗೆ ರಿಲಯನ್ಸ್ ಇಂಡಸ್ಟ್ರೀಸ್ ಕಂಪೆನಿಯು ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಕಂಪೆನಿಯನ್ನು ವಹಿವಾಟಿನ ಗಾತ್ರದಲ್ಲಿ ಹಿಂದಿಕ್ಕಿದೆ ಎಂಬ ಅಂಶ ಹೊರಬಿದ್ದಿದೆ. ಅಂದರೆ ಈ ಕಂಪೆನಿಯು ರಿಲಯನ್ಸ್ ಇಂಡಸ್ಟ್ರೀಸ್ ಮಟ್ಟದಲ್ಲಿದೆ. ರು. 10ರ ಮುಖಬೆಲೆ ಷೇರಿನ ಬೆಲೆ ವಾರ್ಷಿಕ ಕನಿಷ್ಠ ಮಟ್ಟದಲ್ಲಿದ್ದು, ಈಗ ರು. 105ರ ಸಮೀಪವಿದೆ. ಈ ಕಂಪೆನಿಯು ಷೇರುದಾರರಿಗೆ ಆಕರ್ಷಕವಾದ ಕಾರ್ಪೊರೇಟ್ ಫಲಗಳನ್ನು ನೀಡಿದೆ. 2018ರ ಮಾರ್ಚ್ ನಲ್ಲಿ 1:1ರ ಅನುಪಾತದ ಬೋನಸ್ ಷೇರು ವಿತರಿಸಿದೆ, ಡಿಸೆಂಬರ್ 2018ರಲ್ಲಿ ಷೇರುಗಳನ್ನು ಹಿಂಕೊಳ್ಳುವ ಮೂಲಕವೂ ಷೇರುದಾರರಿಗೆ ಲಾಭ ಮಾಡಿಕೊಟ್ಟಿದೆ. ಈ ವರ್ಷ ಮಧ್ಯಂತರ ಲಾಭಾಂಶವನ್ನು ಘೋಷಿಸಿಲ್ಲ. ಆ ಕಾರಣಕ್ಕೆ ಆಕರ್ಷಕವಾದ ಲಾಭಾಂಶ ನಿರೀಕ್ಷಿಸಬಹುದಾಗಿದೆ.

ಎನ್ ಎಂಡಿಸಿ ಲಿಮಿಟೆಡ್

ಎನ್ ಎಂಡಿಸಿ ಕಂಪೆನಿಯ ರು. 1ರ ಮುಖಬೆಲೆಯ ಷೇರನ್ನು 2010ರಲ್ಲಿ ಪ್ರತಿ ಷೇರಿಗೆ ರು. 300ರಂತೆ ವಿತರಿಸಿತ್ತು. ಮತ್ತೊಮ್ಮೆ 2018ರ ಜನವರಿಯಲ್ಲಿ ರು. 153.50ರ ಕನಿಷ್ಠ ಬೆಲೆಯಲ್ಲಿ ಷೇರು ವಿತರಿಸಿತು. ಆದರೆ ಕಳೆದ ಆಗಸ್ಟ್ ತಿಂಗಳಲ್ಲಿ ರು.74.80 ವಾರ್ಷಿಕ ಕನಿಷ್ಠದ ದಾಖಲೆ ನಿರ್ಮಿಸಿತು. ಈಗಿನ ದಿನಗಳಲ್ಲಿ ನಿರಂತರವಾಗಿ ಷೇರಿನ ದರ ಕುಸಿದು, ರು. 88.45 ಕ್ಕೆ ಕುಸಿದು, ನಂತರ ಸ್ವಲ್ಪ ಚೇತರಿಕೆ ಕಂಡು ಸದ್ಯಕ್ಕೆ ರು. 92ರ ಸಮೀಪವಿದೆ. ಈ ಕಂಪೆನಿಯು ಫೆಬ್ರವರಿ ತಿಂಗಳಲ್ಲಿ ರು. 1ರ ಮುಖಬೆಲೆಯ ಪ್ರತಿ ಷೇರಿಗೆ ರು. 5.29 ರಂತೆ ಮಧ್ಯಂತರ ಲಾಭಾಂಶವನ್ನು ವಿತರಿಸಿದೆ. ಒಂದು ತಿಂಗಳಲ್ಲಿ ರು. 125ರ ಸಮೀಪದಿಂದ ರು.89ರ ವರೆಗೂ ಕುಸಿದಿರುವ ಈ ಕಂಪೆನಿಯು ಉತ್ತಮವಾಗಿ ಕಾರ್ಯ ನಿರ್ವಹಿಸುತ್ತಿರುವ ಕಾರಣ ಹೆಚ್ಚಿನ ಅಂತಿಮ ಲಾಭಾಂಶ ನಿರೀಕ್ಷಿಸಬಹುದು.

ಆರ್ ಇ ಸಿ ಲಿಮಿಟೆಡ್

ಆರ್ ಇಸಿ (ರೂರಲ್ ಎಲೆಕ್ಟ್ರಿಫಿಕೇಷನ್ ಕಾರ್ಪೊರೇಷನ್) ಲಿಮಿಟೆಡ್ ಕಂಪೆನಿಯು ಪವರ್ ವಲಯದ ಸಾರ್ವಜನಿಕ ಉದ್ದಿಮೆಯಾಗಿದ್ದು, ಶೇಕಡಾ 52.63ರಷ್ಟು ಪಾಲನ್ನು ಕೇಂದ್ರ ಸರ್ಕಾರ ಹೊಂದಿದೆ. ಈ ಕಂಪೆನಿಯ ಷೇರಿನ ಬೆಲೆ ರು. 118ರ ಸಮೀಪವಿದೆ. ಒಂದೇ ತಿಂಗಳಲ್ಲಿ ರು. 158ರ ಸಮೀಪದಿಂದ ರು. 116.75ರ ವಾರ್ಷಿಕ ಕನಿಷ್ಠಕ್ಕೆ ಜಾರಿರುವ ಸಾಧನೆಯಾಧಾರಿತ ಕಂಪೆನಿಯಾಗಿದೆ. ಫೆಬ್ರವರಿ 11ರಂದು ರು. 10ರ ಮುಖಬೆಲೆಯ ಪ್ರತಿ ಷೇರಿಗೆ ರು.11ರಂತೆ ಮಧ್ಯಂತರ ಲಾಭಾಂಶವನ್ನು ವಿತರಿಸಿದೆ. ಮಾರ್ಚ್ ನಂತರದಲ್ಲಿ ಅಂತಿಮ ಲಾಭಾಂಶವನ್ನು ನಿರೀಕ್ಷಿಸಬಹುದು. ಈ ಕಂಪೆನಿಯನ್ನು ಮತ್ತೊಂದು ಪವರ್ ವಲಯದ ಪವರ್ ಫೈನಾನ್ಸ್ ಕಾರ್ಪೊರೇಷನ್ ನಲ್ಲಿ ವಿಲೀನಗೊಳಿಸುವ ಯೋಜನೆ ಜಾರಿಯಾಗಬೇಕಾಗಿದೆ. 2016ರಲ್ಲಿ ಕಂಪೆನಿಯು 1:1ರ ಅನುಪಾತದ ಬೋನಸ್ ಷೇರು ವಿತರಿಸಿದೆ.

ಕೋಲ್ ಇಂಡಿಯಾ ಲಿಮಿಟೆಡ್

2010ರಲ್ಲಿ ನವರತ್ನ ಕಂಪೆನಿ ಕೋಲ್ ಇಂಡಿಯಾ ಪ್ರತಿ ಷೇರಿಗೆ ರು. 245ರಂತೆ ವಿತರಣೆ ಮಾಡಿತು. ಸದ್ಯಕ್ಕೆ ವಾರ್ಷಿಕ ಕನಿಷ್ಠ ಬೆಲೆಯ ಸಮೀಪವಿರುವ ಈ ಷೇರು 2019ರ ಜೂನ್ ತಿಂಗಳಲ್ಲಿ ರು.270ರ ವರೆಗೂ ತಲುಪಿ, ವಾರ್ಷಿಕ ಗರಿಷ್ಠ ದಾಖಲಿಸಿತ್ತು. ಈ ಷೇರು ಮೇ 2011ರಲ್ಲಿ ರು. 422ರ ವರೆಗೂ ಏರಿಕೆ ಕಂಡು, ವಿಜೃಂಭಿಸಿತು. ಅಲ್ಲಿಂದ ತನ್ನ ಸ್ಥಾನವನ್ನು ಕಳೆದುಕೊಂಡಿತು. ಈ ಕಂಪೆನಿಯು ಒಂದು ಸಮಯದಲ್ಲಿ ಸೆನ್ಸೆಕ್ಸ್ ನ ಭಾಗವಾಗಿದ್ದು, ನಂತರ ಅದರಿಂದ ಹೊರಬಂದಿದೆ. ದೇಶದ ಶೇಕಡಾ 80ಕ್ಕೂ ಹೆಚ್ಚಿನ ಕಲ್ಲಿದ್ದಲಿನ ಅಗತ್ಯವನ್ನು ಪೂರೈಸುವ ಈ ಕಂಪೆನಿ ಷೇರು ವಿತರಣೆ ಬೆಲೆಗಿಂತ ಕಡಿಮೆ ದರದಲ್ಲಿ ಅಂದರೆ ರು. 169ರ ಸಮೀಪ ವಹಿವಾಟಾಗುತ್ತಿದೆ. 2018ರಲ್ಲಿ ಪ್ರತಿ ಷೇರಿಗೆ ರು. 16.50, 2019ರಲ್ಲಿ ಪ್ರತಿ ಷೇರಿಗೆ ರು. 13.10ರಂತೆ ಲಾಭಾಂಶವನ್ನು ವಿತರಿಸಿದ್ದಲ್ಲದೆ, ಪ್ರತಿ ಷೇರಿಗೆ ರು. 235ರಂತೆ ಬೈಬ್ಯಾಕ್ ಮಾಡಿದೆ. ಈ ಕಂಪೆನಿಯು ಮಾರ್ಚ್ 6ರಂದು ಮಧ್ಯಂತರ ಲಾಭಾಂಶ ವಿತರಣೆಯನ್ನು ಘೋಷಿಸುವ ಕಾರ್ಯಸೂಚಿ ಹೊರಬಿದ್ದಿದ್ದು, ಲಾಭಾಂಶ ವಿತರಣೆಗೆ ಮಾರ್ಚ್ 17 ನಿಗದಿತ ದಿನವಾಗಿದೆ.

ಗೇಲ್ (ಇಂಡಿಯಾ) ಲಿಮಿಟೆಡ್

ಗೇಲ್ (ಇಂಡಿಯಾ) ಲಿಮಿಟೆಡ್ ಸಾರ್ವಜನಿಕ ವಲಯದ ಮಹಾರತ್ನ ಕಂಪೆನಿಯಾಗಿದ್ದು, ಕೇಂದ್ರ ಸರ್ಕಾರವು ಈ ಕಂಪೆನಿಯಲ್ಲಿ ಶೇಕಡಾ 52.13ರಷ್ಟು ಪಾಲನ್ನು ಹೊಂದಿದೆ. ಕಳೆದ ಡಿಸೆಂಬರ್ ಅಂತ್ಯದ ತ್ರೈಮಾಸಿಕದಲ್ಲಿ ಕಂಪೆನಿಯು ಸ್ವಲ್ಪ ಸುಧಾರಣೆ ಕಂಡಿದ್ದರೂ ಎ ಜಿ ಆರ್ ವಿಷಯದಲ್ಲಿ ಗೊಂದಲ ನಿವಾರಣೆ ಆಗಬೇಕಾಗಿದೆ. ಫೆಬ್ರವರಿಯಲ್ಲಿ ಪ್ರತಿ ಷೇರಿಗೆ ರು. 6.40 ಮಧ್ಯಂತರ ಲಾಭಾಂಶವನ್ನು ವಿತರಿಸಿದೆ. ಪ್ರತಿ ವರ್ಷವೂ ಆಕರ್ಷಕ ಲಾಭಾಂಶವನ್ನು ವಿತರಿಸುವ ಈ ಕಂಪೆನಿ ಹಿಂದಿನ ವರ್ಷ 1:1ರ ಅನುಪಾತದ ಬೋನಸ್ ಷೇರು ವಿತರಿಸಿದೆ. ಕಳೆದ ಒಂದು ತಿಂಗಳಲ್ಲಿ ರು. 132ರ ಸಮೀಪದಿಂದ ಕುಸಿದಿರುವ ಈ ಷೇರು ಶುಕ್ರವಾರ 28ರಂದು ರು. 102ರ ಸಮೀಪಕ್ಕೆ ಕುಸಿದಿತ್ತು. ಸದ್ಯ ರು. 105ರ ಸಮೀಪವಿರುವ ಈ ಕಂಪೆನಿ ಷೇರಿನ ವಾರ್ಷಿಕ ಗರಿಷ್ಠ ಮಟ್ಟ ರು. 180.

ಹಿಂದೂಸ್ತಾನ್ ಏರೋನಾಟಿಕ್ಸ್ ಕಂಪೆನಿ ಲಿಮಿಟೆಡ್

ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ ನವರತ್ನ ಕಂಪೆನಿಯಾಗಿದ್ದು, 2018ರ ಮಾರ್ಚ್ ನಲ್ಲಿ ಪ್ರತಿ ಷೇರಿಗೆ ರು. 1,215ರಲ್ಲಿ ಸಾರ್ವಜನಿಕ ಷೇರು ವಿತರಣೆ ಮಾಡಿತು. ನಂತರದ ದಿನಗಳಲ್ಲಿ ಷೇರಿನ ಬೆಲೆ ಸತತವಾದ ಇಳಿಕೆಯತ್ತ ಸಾಗಿದೆ. ಸದ್ಯಕ್ಕೆ ರು. 685ರ ಸಮೀಪವಿರುವ ಈ ಕಂಪೆನಿ ಷೇರು ಹೂಡಿಕೆದಾರರ ಸುಮಾರು ಶೇಕಡಾ 45ರಷ್ಟು ಬಂಡವಾಳವನ್ನು ನಾಶಗೊಳಿಸಿದೆ. ಹಿಂದಿನ ವರ್ಷದ ಮಾರ್ಚ್ ನಲ್ಲಿ ಪ್ರತಿ ಷೇರಿಗೆ ರು. 19.80ರಂತೆ ಲಾಭಾಂಶ ವಿತರಿಸಿತ್ತು. ಈ ವರ್ಷವೂ ಉತ್ತಮವಾದ ಲಾಭಾಂಶವನ್ನು ನಿರೀಕ್ಷಿಸಬಹುದು. ಮುಖ್ಯವಾಗಿ ವಿತರಣೆಯ ಬೆಲೆಗಿಂತ ಹೆಚ್ಚಿನ, ಭಾರಿ ಗಾತ್ರದ ಕುಸಿತ ಕಂಡಿರುವ ಈ ಕಂಪೆನಿಯ ಷೇರು ಬಂಡವಾಳ ವೃದ್ಧಿಗೆ ಉತ್ತಮ ಕೊಡುಗೆಯಾಗಬಲ್ಲದು.

ಪವರ್ ಫೈನಾನ್ಸ್ ಕಾರ್ಪೊರೇಷನ್ ಲಿಮಿಟೆಡ್

ಪವರ್ ಫೈನಾನ್ಸ್ ಕಾರ್ಪೊರೇಷನ್ ಲಿಮಿಟೆಡ್ ಆರ್ಥಿಕ ವಲಯದ ಕಂಪೆನಿಯಾಗಿದ್ದು, ಕೇಂದ್ರ ಸರ್ಕಾರವು ಶೇಕಡಾ 55.99 ಪಾಲನ್ನು ಹೊಂದಿದೆ. ರು. 10ರ ಮುಖಬೆಲೆಯ ಈ ಷೇರಿನ ಡಿಸೆಂಬರ್ 2019ರ ತ್ರೈಮಾಸಿಕದ ಇಪಿಎಸ್ ರು. 6.36 ಮತ್ತು ಮಾರ್ಚ್ 2019ರ ಅಂತ್ಯದಲ್ಲಿ ರು. 26.34 ಇತ್ತು. ಈ ಕಂಪೆನಿ ಫೆಬ್ರವರಿ ಅಂತ್ಯದಲ್ಲಿ ಪ್ರತಿ ಷೇರಿಗೆ ರು. 9.50ರಂತೆ ಮಧ್ಯಂತರ ಲಾಭಾಂಶವನ್ನು ವಿತರಿಸಿದೆ. 2016ರಲ್ಲಿ 1:1 ರ ಅನುಪಾತದ ಬೋನಸ್ ಷೇರನ್ನು ವಿತರಿಸಿದೆ. ಜೂನ್ 2019ರಲ್ಲಿ ರು. 138.80ರ ವಾರ್ಷಿಕ ಗರಿಷ್ಠ ತಲುಪಿದ ನಂತರ ಜನವರಿ 2020ರಲ್ಲಿ ರು. 105ರ ಸಮೀಪಕ್ಕೆ ಕುಸಿದು, ಫೆಬ್ರವರಿ ತಿಂಗಳಲ್ಲಿ ಮತ್ತೆ ರು. 133ಕ್ಕೆ ಪುಟಿದೆದ್ದು, ಲಾಭಾಂಶದ ನಂತರದ ವಹಿವಾಟಿನಲ್ಲಿ ರು. 109ರ ವರೆಗೂ ತಲುಪಿದೆ. ಇತರ ಖಾಸಗಿ ವಲಯದ ಖ್ಯಾತ ಕಂಪೆನಿಗಳಿಗಿಂತ ಹೆಚ್ಚಿನ ಲಾಭ ಗಳಿಸುತ್ತಿರುವ ಈ ಕಂಪೆನಿಯ ಷೇರಿನ ಬೆಲೆ ಪಾತಾಳಕ್ಕೆ ಕುಸಿದಿರುವಾಗ ಹೂಡಿಕೆಗೆ ಉತ್ತಮ ಅವಕಾಶವಾಗಿದೆ.

ಆಯಿಲ್ ಇಂಡಿಯಾ ಲಿಮಿಟೆಡ್

ಆಯಿಲ್ ಇಂಡಿಯಾ ಲಿಮಿಟೆಡ್ ಕಂಪೆನಿಯು ತೈಲ ಪರಿಶೋಧನೆ ವಲಯಕ್ಕೆ ಸೇರಿದ್ದು, ಕೇಂದ್ರ ಸರ್ಕಾರವು ಶೇಕಡಾ 59.57ರಷ್ಟು ಭಾಗಿತ್ವವನ್ನು ಹೊಂದಿದೆ. ರು. 10ರ ಮುಖಬೆಲೆಯ ಷೇರಿನ ಸದ್ಯದ ಬೆಲೆಯು ರು. 108ರಲ್ಲಿದೆ. ಕಳೆದ ಒಂದು ತಿಂಗಳಲ್ಲಿ ರು. 141 ರಿಂದ ರು. 105ಕ್ಕೆ ಕುಸಿದಿರುವುದು ಪೇಟೆಯ ವಾತಾವರಣಕ್ಕೆ ಹಿಡಿದ ಕನ್ನಡಿಯಾಗಿದೆ. ಫೆಬ್ರವರಿಯಲ್ಲಿ ಈ ಕಂಪೆನಿಯು ಪ್ರತಿ ಷೇರಿಗೆ ರು. 9ರಂತೆ ಮಧ್ಯಂತರ ಲಾಭಾಂಶ ವಿತರಿಸಿದೆ. ಪ್ರತಿ ವರ್ಷವೂ ಈ ರೀತಿಯ ಆಕರ್ಷಕ ಲಾಭಾಂಶ ನೀಡುತ್ತಿರುವ ಕಂಪೆನಿಯ ಷೇರು ಭಾರಿ ಕುಸಿತ ಕಂಡಿರುವುದರಿಂದ ಬ್ಯಾಂಕ್ ಡಿಪಾಜಿಟ್ಟುಗಳಂತೆ ಇಂತಹ ಕಂಪೆನಿಗಳಲ್ಲಿ ಹೂಡಿಕೆ ಮಾಡಿ, ನಿರಂತರವಾಗಿ ಲಾಭಾಂಶ ಪಡೆಯಬಹುದು ಮತ್ತು ಷೇರಿನ ಬೆಲೆ ಏರಿದಾಗ ಬಂಡವಾಳ ಲಾಭವನ್ನು ಗಳಿಸಬಹುದು.

ಇಂಜಿನೀರ್ಸ್ ಇಂಡಿಯಾ ಲಿಮಿಟೆಡ್

ಇಂಜಿನೀರ್ಸ್ ಇಂಡಿಯಾ ಲಿಮಿಟೆಡ್ ಕಂಪೆನಿಯು ಸೇವಾ ವಲಯಕ್ಕೆ ಸೇರಿದ್ದು, ಕೇಂದ್ರ ಸರ್ಕಾರವು ಶೇಕಡಾ 51.50 ಪಾಲನ್ನು ಹೊಂದಿದೆ. ರು. 5ರ ಮುಖಬೆಲೆಯ ಷೇರಿನ ಸದ್ಯದ ಬೆಲೆಯು ರು. 70ರಲ್ಲಿದೆ. ಕಳೆದ ಒಂದು ತಿಂಗಳಲ್ಲಿ ರು. 99ರಿಂದ ರು. 70ಕ್ಕೆ ಕುಸಿದಿದೆ. ಫೆಬ್ರವರಿಯಲ್ಲಿ ಈ ಕಂಪೆನಿಯು ಪ್ರತಿ ಷೇರಿಗೆ ರು. 3.60ರಂತೆ ಮಧ್ಯಂತರ ಲಾಭಾಂಶವನ್ನು ವಿತರಿಸಿದೆ. ಪ್ರತಿ ವರ್ಷವೂ ಈ ರೀತಿಯ ಲಾಭಾಂಶ ನೀಡುತ್ತಿರುವ ಕಂಪೆನಿಯ ಷೇರು ಭಾರಿ ಕುಸಿತ ಕಂಡಿದೆ. 2016ರಲ್ಲಿ 1:1 ಅನುಪಾತದ ಬೋನಸ್ ಷೇರು ವಿತರಿಸಿದೆ.

ಭಾರತ್ ಎಲೆಕ್ಟ್ರಾನಿಕ್ಸ್ ಲಿಮಿಟೆಡ್

ಭಾರತ್ ಎಲೆಕ್ಟ್ರಾನಿಕ್ಸ್ ಲಿಮಿಟೆಡ್ ನವರತ್ನ ಕಂಪೆನಿಯಾಗಿದ್ದು ಇದರಲ್ಲಿ ಕೇಂದ್ರ ಸರ್ಕಾರವು ಶೇಕಡಾ 55.27 ಪಾಲನ್ನು ಹೊಂದಿದೆ. ಈ ಕಂಪೆನಿ ಷೇರಿನ ಬೆಲೆ ಕಳೆದ ಒಂದು ತಿಂಗಳಿನಲ್ಲಿ ರು. 103ರ ಸಮೀಪದಿಂದ ರು. 73ರ ವರೆಗೂ ಕುಸಿದಿದೆ. ರು. 1ರ ಮುಖಬೆಲೆಯ ಈ ಕಂಪೆನಿ ಷೇರು ನವೆಂಬರ್ 2019ರಲ್ಲಿ ರು. 122ರ ಗರಿಷ್ಠದಲ್ಲಿತ್ತು. 2018ರ ಮಾರ್ಚ್ ನಲ್ಲಿ ಕಂಪೆನಿಯು ತನ್ನ ಷೇರುದಾರರಿಂದ ರು. 182.50ಗೆ ಬೈಬ್ಯಾಕ್ ಮಾಡಿದೆ. ಅಂದರೆ ಕಂಪೆನಿಯ ವ್ಯಾಲ್ಯೂಯೇಷನ್ ಭಾರಿ ಕುಸಿತ ಕಂಡಿದೆ ಎಂದಾಯಿತು. ಫೆಬ್ರವರಿ ತಿಂಗಳಲ್ಲಿ ಪ್ರತಿ ಷೇರಿಗೆ ರು. 1.40ರಂತೆ ಮಧ್ಯಂತರ ಲಾಭಾಂಶವನ್ನು ವಿತರಿಸಿದೆ.

ಆಯಿಲ್ ಅಂಡ್ ನ್ಯಾಚುರಲ್ ಗ್ಯಾಸ್ ಕಾರ್ಪೊರೇಷನ್ ಲಿಮಿಟೆಡ್

ಒಎನ್ ಜಿಸಿ ಎಂದೇ ಖ್ಯಾತವಾಗಿರುವ ಈ ಕಂಪೆನಿಯು ಸೆನ್ಸೆಕ್ಸ್ ಮತ್ತು ನಿಫ್ಟಿಯಲ್ಲಿ ಸ್ಥಾನ ಪಡೆದುಕೊಂಡಿದೆ. ಈ ಹಿಂದೆ ಕೇಂದ್ರ ಸರ್ಕಾರದ ಬಂಡವಾಳ ಹಿಂತೆಗೆತ ಕಾರ್ಯಕ್ರಮ ಯಶಸ್ಸು ಕಾಣಲು ಹೆಚ್ಚಿನ ಕೊಡುಗೆ ನೀಡಿದೆ. ಅಲ್ಲದೆ 2018ರಲ್ಲಿ ತೈಲ ಮಾರಾಟ ಕಂಪೆನಿಯಾದ ಹಿಂದೂಸ್ತಾನ್ ಪೆಟ್ರೋಲಿಯಂ ಕಾರ್ಪೊರೇಷನ್ ಕಂಪೆನಿಯ ಶೇಕಡಾ 51.11ರ ಪಾಲನ್ನು ಕೇಂದ್ರ ಸರ್ಕಾರದಿಂದ ಖರೀದಿಸಿತು. ಹಾಗಾಗಿ ತನ್ನಲ್ಲಿರುವ ಹೆಚ್ಚುವರಿ ನಿಧಿಯನ್ನು ಬಳಸಿಕೊಂಡಿದ್ದಲ್ಲದೆ ಹೊರಗಿನಿಂದಲೂ ಸಂಪನ್ಮೂಲ ಸಂಗ್ರಹಿಸಿಕೊಂಡು, ರು. 36,915 ಕೋಟಿ ವಿನಿಯೋಗಿಸಿತು. ಹಿಂದಿನ ವರ್ಷ ಎರಡು ಮಧ್ಯಂತರ ಹಾಗೂ ಅಂತಿಮ ಲಾಭಾಂಶಗಳಿಂದ ಒಟ್ಟು ರು. 7ರಷ್ಟು ಲಾಭಾಂಶ ವಿತರಿಸಿತ್ತು. ಕಂಪೆನಿಯ ಆಡಳಿತ ಮಂಡಳಿಯು ಮಾರ್ಚ್ 4ರಂದು ಮಧ್ಯಂತರ ಲಾಭಾಂಶ ಪ್ರಕಟಿಸುವ ಕಾರ್ಯ ಸೂಚಿಯನ್ನು ಹೊಂದಿದ್ದು, ಇದಕ್ಕಾಗಿ ಮಾರ್ಚ್ 13 ರೆಕಾರ್ಡ್ ಡೇಟ್ ಎಂದು ಪ್ರಕಟಿಸಿದೆ.

ಎಂಎಂಟಿಸಿ ಲಿಮಿಟೆಡ್

ಎಂಎಂಟಿಸಿ ಷೇರಿನ ಬೆಲೆ 2013ರ ಮಾರ್ಚ್ ನಲ್ಲಿ ರು. 250ರಲ್ಲಿದ್ದು, ಸರ್ಕಾರವು ಪ್ರತಿ ಷೇರಿಗೆ ರು. 60ರಂತೆ ಆಫರ್ ಫಾರ್ ಸೇಲ್ (OFS) ಮೂಲಕ ಮಾರಾಟ ಮಾಡುವ ಯೋಜನೆ ಪ್ರಕಟಿಸುತ್ತಿದ್ದಂತೆಯೇ ಷೇರಿನ ಬೆಲೆ ನಿರಂತರವಾಗಿ ಕುಸಿದು ರು. 50ರೊಳಗೆ ಕುಸಿಯಿತು. ಜನವರಿ 2013 ರಲ್ಲಿ ರು. 430ರ ಸಮೀಪವಿದ್ದ ಷೇರಿನ ಬೆಲೆ ಜೂನ್ ತಿಂಗಳ ವಿತರಣೆ ವೇಳೆಗೆ ರು. 150ರ ಸಮೀಪಕ್ಕೆ ಕುಸಿಯಿತು. ಈ ಕುಸಿತವು ನಿರಂತರವಾದ ಕೆಳಗಿನ ಆವರಣ ಮಿತಿ (Lower Circuit) ತಲುಪುವ ಮೂಲಕ ಪ್ರದರ್ಶಿತವಾಯಿತು. 2011-12ರಲ್ಲಿ ರು. 70.72 ಕೋಟಿ ಲಾಭ ಗಳಿಸಿದ್ದ ಕಂಪೆನಿ, 2012-13ರಲ್ಲಿ ರು. 70.62 ಕೋಟಿಯಷ್ಟು ನಷ್ಟ ಅನುಭವಿಸಿತ್ತು. ಈ ವಿತರಣೆಯ ನಂತರ ಷೇರಿನ ಬೆಲೆ ನಿರಂತರವಾದ ಕುಸಿತದತ್ತ ಸಾಗಿ ರು. 17ರ ಸಮೀಪಕ್ಕೆ ತಲುಪಿದೆ. ಈ ಮಧ್ಯೆ 2018ರಲ್ಲಿ 1:2ರ ಅನುಪಾತದ ಬೋನಸ್ ಷೇರು ವಿತರಿಸಿದೆ. ಅಂದರೆ ಏಳು ವರ್ಷಗಳಾದರೂ ವಿತರಿಸಿದ ಬೆಲೆಗೂ ತಲುಪದೇ ಇರುವುದು, ಲಾಭ ಗಳಿಕೆ ಕ್ಷೀಣಿಸುತ್ತಿರುವುದು ಬೇಸರದ ಅಂಶವಾಗಿದೆ. ಈ ಕಂಪೆನಿಯಲ್ಲಿ ಕೇಂದ್ರ ಸರ್ಕಾರವು ಶೇಕಡಾ 89.93ರಷ್ಟು ಪಾಲನ್ನು ಹೊಂದಿದ್ದು, ಮುಂದಿನ ದಿನಗಳಲ್ಲಿ ಕಂಪೆನಿ ಚೇತರಿಕೆ ಕಾಣಬಹುದೆಂಬ ನಿರೀಕ್ಷೆ ಇದೆ.

ಲೇಖಕ ಕೆ. ಜಿ. ಕೃಪಾಲ್ ಬಗ್ಗೆ

ಷೇರು ಮಾರುಕಟ್ಟೆಯಲ್ಲಿ ಮೂರು ದಶಕಕ್ಕೂ ಹೆಚ್ಚಿನ ಅನುಭವ ಇರುವವರು ಕೆ. ಜಿ. ಕೃಪಾಲ್. ಈಗಲೂ ಸಕ್ರಿಯ ಷೇರು ದಲ್ಲಾಳಿಗಳಾಗಿರುವ ಅವರು, ಅಪಾರ ಸಂಖ್ಯೆಯ ಹೂಡಿಕೆದಾರ ಜಾಗೃತಿ ಸಮಾವೇಶಗಳಲ್ಲಿ ಮಾರ್ಗದರ್ಶನ ನೀಡಿದ್ದಾರೆ. ದೂರದರ್ಶನದ ಕಾರ್ಯಕ್ರಮಗಳಲ್ಲಿ ಭಾಗಿಯಾಗಿದ್ದಾರೆ. ಮುದ್ರಣ, ಎಲೆಕ್ಟ್ರಾನಿಕ್, ಆನ್ ಲೈನ್ ಮೀಡಿಯಾ ಯಾವುದೂ ಕೃಪಾಲ್ ಅವರ ಲೇಖನಗಳಿಂದ ಹೊರತಾಗಿಲ್ಲ. ಅಂಕಣಕಾರರಾಗಿಯೂ ಚಿರಪರಿಚಿತರು. ಅವರ ಲೇಖನಗಳು ಪುಸ್ತಕಗಳಾಗಿ ಹಲವು ಮುದ್ರಣ ಕಂಡಿವೆ. ಆರ್ಥಿಕ ವಿಷಯಗಳ ಬಗ್ಗೆ ಸಮಚಿತ್ತದ ಒಳನೋಟಗಳಿಂದಾಗಿ ಆರ್ಥಿಕ ವಿಷಯಗಳ ಬಗ್ಗೆ ಕನ್ನಡದಲ್ಲಿ ಬರೆಯುವ, ಮಾತನಾಡುವ ಪ್ರಮುಖರೆನಿಸಿದ್ದಾರೆ.